საქართველოს საგანმანათლებლო დაწესებულებებში სასწავლო წელი აქტიურად მიმდინარეობს. სკოლებსა და ბაღებში ეწყობა ღონისძიებები, სადაც ბავშვები სხვადასხვა საინტერესო ნომერს ასრულებენ და შესაძლებლობებს ავლენენ. სხვა აქტივობებთან ერთად, ისინი აუცილებლად კითხულობენ ლექსებს. 

ამჯერად, სკოლებსა და ბაღებში საშემოდგომო ზეიმები იმართება. ჩვენ გთავაზობთ ლექსებს, რომელთა ცოდნაც ბავშვებს საშემოდგომო ღონისძიებებზე გამოადგებათ. 


ვაზი გვიხმობს (ნესტან კუპრავა)

ვაზი უხმობს პატარებს:
-მოდით! მოდით ყველანი,
თქვენც გასინჯეთ
დამტკბარი
ყურძნის მწიფე მტევანი!

ჩხა, ჯაგანი, აკიდო...
ზვრებში ბავშვებს ელიან,
ისმის სიცილ-კისკისი,-
მხიარული რთველია,
სავსე შემოდგომაა!
აბა, დელი-დელია!


რთველი (ლუარა ჭანტურია)

ვენახში ვართ მთელი დღე
მე, ნუცა და ლევანი,
სურნელება ტრიალებს
დაშაქრული მტევანის.

რთველს ზეიმობს სოფელი,
ყველა ერთად ხალისობს,
დაკრეფილი ყურძენით
საწნახელი აივსო.

ბებომ ქვაბი გარეცხა
დიდი, განა პატარა?!
მაჭარი რომ დატკბება,
მოადუღებს თათარას.


შემოდგომის ამინდი (ხათუნა გულიაშვილი)