kotejebi.ge ხის კოტეჯებს უცხოეთშიც ააშენებს

ხის კოტეჯების მწარმოებელი ქართული კომპანია kotejebi.ge მომავალი წლიდან სამშენებლო პროცესის დაწყებას უცხოურ ბაზრებზე გეგმავს. ამის შესახებ „ბიზნესპარტნიორს“ kotejebi.ge-ის მთავარმა არქიტექტორმა განუცხადა.

როგორც გიორგი მგელაძე ამბობს, ხის კოტეჯების საზღვარგარეთ ექსპორტი დიდ თანხებთან არის დაკავშირებული, ამიტომ, მათი აშენება ადგილზე ბევრად ხელსაყრელია.

„თანამშრომლობაზე მოლაპარაკებები რამდენიმე ქვეყანასთან უკვე მიმდინარეობს. ამჟამად, ამ ქვეყნებს ვერ დაგისახელებთ, თუმცა გვინდა, რომ 2024 წლიდან იქ, ადგილზევე დავიწყოთ ხის კოტეჯების აწყობა“, - განმარტა kotejebi.ge-ის მთავარმა არქიტექტორმა .

მისივე ინფორაციით, მსოფლიო ბაზრების მსგავსად, წლიდან წლამდე, ხის კოტეჯების გაყიდვები იზრდება საქართველოშიც.

„აჭარა, სვანეთი, რაჭა, კახეთი, წალკის რეგიონი - ეს იმ ადგილები მცირე ჩამონათვალია, სადაც საქართველოში, ადგილობრივი წარმოების ხის კოტეჯები დიდი რაოდენობითაა თავმოყრილი. რაც მთავარია, ქართული ხის სახლები საერთაშორისო სტანდარტების დაცვით მზადდება - ჩვენი კოტეჯები დაცულია წყალმედეგობაზე, ხანძარმედეგობაზეც და ჭიამედეგობაზეც“, - აღნიშნა გიორგი მგელაძემ.

მისივე ინფორმაციით, წარმოებაში უმეტესად იმპორტირებულ ნედლეულს იყენებენ, რომელსაც ხარისხის შესაბამისი სერთიფიკატი მოჰყვება.

ცნობისთვის, kotejebi.ge ბაზარზე 3 წლის წინ გამოჩნდა და უკვე 230-ზე მეტი დასრულებული პროექტის ავტორია.