საქართველოს მთავარი პროკურატურა ბექა (საბი) ბერიანის მკვლელობასა და ბიანკა შიგუროვას მიმართ განხორციელებულ ფიზიკურ ძალადობაში ბრალდებულთან დაკავშირებით განცხადებას ავრცელებს:
“სასამართლო პროცესზე გამოკვლეული მტკიცებულებებით დადასტურდა, რომ 2014 წლის 10 ნოემბერს, დაახლოებით 20:00 საათზე, ქ.თბილისში, ბუხაიძის ქუჩაზე ლევან კოჭლაშვილმა ტრანსგენდერ ბიანკა შიგუროვას მიმართ, მისსავე საცხოვრებელ სახლში განახორციელა ფიზიკური ძალადობა და მიაყენა სხეულის დაზიანებები. იმავე დღეს, ლევან კოჭლაშვილს დაახლოებით 22:30 საათზე, ქ.თბილისში, პეკინის ქუჩაზე მდებარე საცხოვრებელ სახლში მცხოვრებ ტრანსგენდერ საბი ბერიანთან ურთიერთშელაპარაკება მოუხდა, რა დროსაც განზრახ მოკვლის მიზნით ლევან კოჭლაშვილმა დანით საბი ბერიანს სხეულის სხვადასხვა არეში რამდენიმე ჭრილობა მიაყენა, შემდეგ კი დანაშაულის კვალის დაფარვის მიზნით ბინაში ხანძარი გააჩინა და შემთხვევის ადგილიდან მიიმალა. მიღებული ჭრილობების შედეგად საბი ბერიანი შემთხვევის ადგილზე გარდაიცვალა. სამართალდამცველებმა ლევან კოჭლაშვილი 12 ნოემბერს თბილისში დააკავეს. მას ბრალდება საქართველოს სისხლის სამართლის კოდექსის 108-ე მუხლით, 125-ე მუხლის პირველი ნაწილითა და 187-ე მუხლის მეორე ნაწილით წარედგინა. თბილისის საქალაქო სასამართლომ 2015 წლის 7 აგვისტოს განაჩენით, ლევან კოჭლაშვილი საქართველოს სისხლის სამართლის კოდექსის 108-ე მუხლით (განზრახ მკვლელობა) წარდგენილ ბრალდებაში გაამართლა და დამნაშავედ სცნო საქართველოს სისხლის სამართლის კოდექსის 125-ე მუხლის პირველი და 187-ე მუხლის მეორე ნაწილებით გათვალისწინებული დანაშაულის ჩადენაში და სასჯელის სახედ და ზომად განუსაზღვრა 4 წლით თავისუფლების აღკვეთა. აღნიშნული განაჩენი პროკურატურამ სააპელაციო წესით გაასაჩივრა. თბილისის სააპელაციო სასამართლომ საქალაქო სასამართლოს განაჩენი ძალაში დატოვა, რის შემდეგაც სააპელაციო სასამართლოს გადაწყვეტილება პროკურატურამ უზენაეს სასამართლოში გაასაჩივრა. საქართველოს უზენაესმა სასამართლომ პროკურატურის საკასაციო საჩივრის საფუძველზე გააუქმა თბილისის სააპელაციო სასამართლოს განაჩენი და ლევან კოჭლაშვილი ყველა წარდგენილ ბრალდებაში დამნაშავედ სცნო და საბოლოოდ სასჯელის სახედ და ზომად 10 წლით თავისუფლების აღკვეთა განუსაზღვრა“, – ნათქვამია პროკურატურის განცხადებაში.
შეგახსენებთ, რომ საბი, იგივე ბექა ბერიანი პეკინზე, საკუთარ სახლში, ხანძრის შედეგად გარდაიცვალა. როგორც მეზობლები აცხადებდნენ, საბი ბერიანიძე მოკლეს და შემდეგ კვალის დაფარვის მიზნით მის საცხოვრებელ სახლში ცეცხლი გააჩინეს.
რაც შეეხება ბიანკა შიგუროვას, როგორც ის აცხადებდა, საბი ბერიანი მისი ორიენტაციის გამო მოკლეს. ბიანკას მტკიცებით, საბის მკვლელი სწორედ ის პიროვნება იყო, ვინც მანამდე მას დაესხა თავს.
ბიანკა შიგუროვა ტრანსგენდერი ქალი ბიანკა შიგუროვა მეტრომშენის დასახლებაში, ბინაში გარდაცვლილი იპოვეს. გარდაცვალების მიზეზად გაზის გაჟონვა დასახელდა.