„ჩემი სხეული ჩემი საქმეა“, „დუმილი ვერ დაგვიცავს“, „you don't own me“, „გვჭირდება სექსუალური განათლება სკოლებში“, „ექიმებს: სექსი და გათხოვება ერთი და იგივე არაა“ - ქალთა საერთაშორისო დღე ქალებმა სექსუალური თავისუფლების მოთხოვნით დაიწყეს. მსვლელობა ფილარმონიის შენობასთან დაიწყო, შეძახილებითა და სტვენით რუსთაველის გამზირი ჩაიარეს და პარლამენტის შენობასთან ქალთა სოლიდარობის აქციას შეუერთდნენ.
მსვლელობის მონაწილეები ამბობენ, რომ დღეს ქალები ერთიანდებიან, რათა ხმამაღლა მოითხოვონ ის უფლებები, რაც მათ სხეულსა და სექსუალობას ეხება. ასევე გააპროტესტონ ის პრაქტიკა, რაც ქალებს ამ უფლებას უზღუდავს.
„ქართული საზოგადოება არ აძლევს ქალს უფლებას, განკარგოს თავისი სხეული და სექსუალობა, რის გამოც ჩვენ გვიწევს, დავმალოთ საკუთარი სექსუალური აქტივობა, ან სულაც – უარი ვთქვათ მასზე. ქვეყნის ეროვნული იდენტობის გადარჩენა/კვლავწარმოება გაიგივებულია ჩვენი სექსუალობის ხელშეუხებლობასთან, რის გამოც ჩვენს სხეულზე კონტროლი ეროვნული ღირსების საკითხი ხდება!
ამ დამოკიდებულებების გამო, ქალებს დღემდე უჭირთ აღიარონ, რომ სექსუალური ცხოვრება აქვთ. ამას ადასტურებს 2017 წელს გამოცემული კვლევის „თაობა გარდამავალ პერიოდში" შედეგებიც (ფრიდრიხ ებერტის ფონდი), სადაც ქალ რესპონდენტთა მხოლოდ 1% ამბობს, რომ ჰყოლია ერთზე მეტი სექსუალური პარტნიორი მაშინ, როცა იმავე პუნქტში მსგავსი გამოცდილებით მამაკაცთა 57% იწონებს თავს.
ვფიქრობთ, დროა დავანახოთ სხვა ქალებს და მთელ საზოგადოებას, რომ ჩვენი სხეული ჩვენ გვეკუთვნის. ჩვენი უფლებაა, ვიყოთ თავისუფლები!" - ამბობენ ფემინისტების დამოუკიდებელი ჯგუფის წევრები. მსვლელობა სწორედ მათი ინიციატივით მოეწყო და მას „საქართველოს ახალგაზრდა მწვანეები", „ქალთა მზერა", „ვისგი" და ფემინისტი აქტივისტები შეუერთდნენ.
მსვლელობის პარალელურად მთავრობის კანცელარიასთან „ქალთა მოძრაობის" ორგანიზებით აქცია-პერფორმანსი გაიმართა, სახელწოდებით „დაამსხვრიე შუშის ჭერი". ქალებმა ისაუბრეს იმ ბარიერებზე რომელიც უხილავია და ქალებს ხელს უშლის უფლებების რეალიზებაში.
„დაამსხვრიე „შუშის ჭერი”! - მივმართავთ ჩვენ ხელისუფლებას, რომელსაც შეუძლია ამ უხილავი ბარიერების მოხსნა გენდერული კვოტების და სხვა საკანონმდებლო რეგულაციების შემოღების გზით.
დაამსხვრიე „შუშის ჭერი”! - მივმართავთ ჩვენ საზოგადოებას, რათა მათ აღარ შეაფასონ ქალების შესაძლებლობები სტერეოტიპულად.
დაამსხვრიე „შუშის ჭერი”! - მივმართავთ ჩვენ ქალებს, რათა მათ აქტურად იბრძოლონ საკუთარი უფლებებისთვის და თანასწორობისთვის,“ - ამბობენ აქცია-პერფორმანსის მონაწილეები.
მოგვიანებით ქალები პარლამენტის შენობასთან გაერთიანდნენ და ქალთა სოლიდარობის აქცია გამართეს, სადაც სხვადასხვა ჯგუფის წარმომადგენელი ქალები სიტყვით გამოვიდნენ.
8 მარტის კვირეულის ფარგლებში არაერთი ღონისძიებაა დაგეგმილი, რომელიც შეგიძლიათ იხილოთ აქ.