უახლოეს პერიოდში, ბათუმის ბულვარის ზოოკუთხის მობინადრეებს დეკორატიული ფრინველების განახლებული სახეობები დაემატება.
ბათუმის ბულვარის ადმინისტრაციამ რამდენიმე სხვადასხვა სახეობის, კერძოდ კი „წყალმცურავი და დეკორატიული ფრინველების შესყიდვაზე“ ელექტრონული ტენდერი მიმდინარე წლის 29 სექტემბერს გამოაცხადა, წინადადების მიღება კი 9 ოქტომბერს, დასრულდება. გამარჯვებული ვალდებულია ფრინველები ხელშეკრულების გაფორმებიდან ერთ თვეში წარმოადგინოს. ფრინველების შესაძენად ბულვარის ადმინისტრაციას 25 ათასი ლარი აქვს გათვალისწინებული.
როგორც მოგეხსენებათ, ბათუმის ბულვარში ზოოკუთხე 2006 წლიდან ფუნქციონირებს. აქ უამრავი დასახელების, როგორც ეგზოტიკური, ასევე დეკორატიული ფრინველი ბინადრობს. (ფარშევანგები, ციცრები, იხვები, გედები, თუთიყუშები, და ა.შ.)
პარალელურად, ბათუმის ბულვარში ზოოკუთხის განახლების სამუშაოებიც მიმდინარეობს. ფარშევანგებისა და თუთიყუშების ვოლიერებს სარეკონსტრუქციო და სარეაბილიტაციო სამუშაოები უტარდება.
ბულვარის ზოოკუთხე და აქ წარმოდგენილი ულამაზესი „გედების ტბა“ ყოველდღიურად უამრავი დამთვალიერებლისა და ტურისტის ყურადღებას იპყრობს.
