«Եթե դուք շուտ եք հարբում ու կորցնում ձեզ, գործ չունեք այս տիրույթի հետ: Այստեղ պետք է խմել ու չհարբել միաժամանակ«». Հրանտ Տեր-Աբրահամյան

Հրետակոծությունների մասին:

Դրանք անշուշտ պատերազմի ամենածանր մասն են, եթե խոսքը քաղաքացիական օբյեկտների մասին է:

Այդուհանդերձ, քաղաքների հրետակոծություններով չի որոշվում պատերազմի ելքը, այլ ռազմաճակատում՝ մարտական գործողություններով, ուր բանակը չափվում է բանակի հետ:

Հաղթում է նա, ով կարողանում է հաղթահարել հակառակորդի զինուժի դիմադրողականությունը:

Հրետակոծություններն էլ, իհարկե, ունեն ռազմական իմաստ և դեր հաղթանականի կամ պարտության մեջ, բայց՝ օժանդակ, երկրորդական: Ոչ թե՝ անկարևոր, այլ երկրորդական՝ դրանք նույն բանը չեն:

Ամեն դեպքում, գլխավորը՝ կռվի բախտը վճռվում է ռազմաճակատում, բանակների պայքարում:

Միայն հրետակոծությամբ հնարավոր չէ հաղթել:

Հրետակածության տված վնասը վերականգնելի է:

Բանակի վճռական հաղթանակի կամ պարտության հետևանքները՝ անհաղթահարելի՝ հաճախ տասնամյակների և դարերի մասշտաբով:

Մեր ապրած իրականությունը միշտ էլ ինչ-որ մի վճռական ճակատամարտի արդյունք է:

Հ.Գ. Օրը տաս անգամ նավթամուղներին և այլնին խփել խորհուրդ տվողներին:

Պատերազմում ամեն բան հնարավոր է:

Բայց եթե բանը հասնի, նրան, որ ստիպված լինենք խփել այդ օբյեկտներին, իմացեք, որ դա գրեթե անխուսափելիորեն նշանակում է պատասխան հարված, որը կարող է գալ հենց անձամբ ձեր ուղղությամբ: Հենց ձեր քաղաքին, ձեր փողոցին, ձեր տանը: Վստա՞հ եք, որ կդիմանաք անձամբ դուք: Դիմացողներ հաստատ կլինեն, բայց դուք պատասխանեք այս հարցին անձամբ ձեր մասով՝ անձամբ ձեզ:

Պատերազմը միակողմանի գործողություն չէ՝ դու հարվածում ես, քեզ հարվածում են:

Գործի մասնագետները կորոշեն, ինչին և երբ խփել: Նույնիսկ վատ մասնագետը հաստատ ձեզնից լավ գիտի ինչ անել:

Եվ վերջինը:

Պատերազմը քուչի կռիվ չի:

Պատերազմը աշխարհի ամենաբարդ ինտելեկտուալ և հոգևոր խնդիրն է:

Այդ ինտելեկտուալ բարդության համեմատ լազաթ է ցանկացած բարդ գիտություն: Որովհետև պատերազմում պետք է հաշվարկել ամենաբարդը՝ մարդկային հոգին:

Այստեղ ոչ միայն ֆիզիկական, այլև մտավոր և բարոյական ուժերի գերլարում է պետք:

Այստեղ ամենատաք կիրքն ու ամենասթափ, ամենասառը բանականությունը միասին են գործում:

Եթե դուք շուտ եք հարբում ու կորցնում ձեզ, գործ չունեք այս տիրույթի հետ: Այստեղ պետք է խմել ու չհարբել միաժամանակ:

Հրանտ Տեր-Աբրահամյանի ֆեյսբուքյան էջից: